ବାଇରୁ ଗମାଙ୍ଗ କନ୍ୟାଶ୍ରମ ଓ ପ୍ରାଥମିକ ବିଦ୍ୟାଳୟରେ ଶିଶୁ ଦିବସ ପାଳିତ, ସଉରା ଭାଷା ବ୍ୟବହାର ଉପରେ ଗୁରୁତ୍ୱ

ପ୍ରତିଫଳନ ମିଡ଼ିଆ

ରାୟଗଡ଼ା ଜିଲ୍ଲା ରାମନାଗୁଡ଼ା ବ୍ଲକର କୁଜେନ୍ଦ୍ରି ପଞ୍ଚାୟତ ଅଧୀନ ସାନକୁଜେନ୍ଦ୍ରି ଗ୍ରାମରେ ଶିଶୁ ଦିବସ ପାଳିତ ହୋଇଯାଇଛି।

ଏହି ଅବସରରେ ବାଇରୁ ଗମାଙ୍ଗ କନ୍ୟାଶ୍ରମର ଅନ୍ତେବାସୀ ବାଳିକାମାନଙ୍କୁ ଶୀତବସ୍ତ୍ର, ପାଠ୍ୟ ଉପକରଣ, ବିସ୍କୁଟ, ଭଗବଦ୍‌ଗୀତା ଓ ହନୁମାନ ଚାଳିଶା ବଣ୍ଟନ କରାଯାଇଥିଲା। ସ୍ୱାଧୀନତା ସଂଗ୍ରାମୀ ସ୍ୱର୍ଗତ ବିଶ୍ୱନାଥ ପଟ୍ଟନାୟକଙ୍କ ଶହୀଦ ସ୍ମୃତି ଭବନ ପରିସରରେ ଥିବା ଏହି କନ୍ୟାଶ୍ରମରେ ଆୟୋଜିତ ସେବାମୂଳକ କାର୍ଯ୍ୟକ୍ରମକୁ ଡଃ ଗୌରାଙ୍ଗ ଚରଣ ରାଉତ ଓ ଜୟଦେବ ସିଠ ପରିଚାଳନା କରିଥିଲେ।

ଏହାପରେ ଗ୍ରାମର ପ୍ରାଥମିକ ବିଦ୍ୟାଳୟରେ ମଧ୍ୟ ଆନନ୍ଦ ଓ ଉତ୍ସାହର ସହ ଶିଶୁ ଦିବସ ପାଳିତ ହୋଇଥିଲା। ମୁଖ୍ୟ ଅତିଥି ଭାବେ ବିଦୁଲତା ହୁଇକା ଏବଂ ସମ୍ମାନିତ ଅତିଥି ଭାବେ ଡଃ ବାଦଲ କୁମାର ତା, ସଦାଶିବ ରାଜଗୁରୁ ଯୋଗଦେଇ ଶିଶୁମାନଙ୍କୁ ଶିକ୍ଷା, ସଂସ୍କାର, ମାତୃଭାଷା ଓ ସାଂସ୍କୃତିକ ପରମ୍ପରାର ମହତ୍ତ୍ୱ ସମ୍ପର୍କରେ ପ୍ରେରଣାଦାୟୀ ବାର୍ତ୍ତା ଦେଇଥିଲେ। ବିଶେଷକରି ନିଜ ଘରେ ଓ ସାମାଜିକ ଜୀବନରେ କୁଇ ଓ ସଉରା ଭାଷାର ବହୁଳ ବ୍ୟବହାର କରିବା ସହ ଏହି ମାତୃଭାଷା ଦୁଇଟିର ସୁରକ୍ଷା ଓ ପ୍ରସାର ପାଇଁ ପିଲାମାନଙ୍କୁ ଆହ୍ୱାନ ଦିଆଯାଇଥିଲା।

ଏହି ଅବସରରେ ଆୟୋଜିତ ବକ୍ତୃତା ପ୍ରତିଯୋଗିତାରେ କୃତିତ୍ୱ ହାସଲ କରିଥିବା ଶିଶୁମାନଙ୍କୁ ପୁରସ୍କୃତ କରାଯାଇଥିଲା। ସରପଞ୍ଚ ରମେଶ ଶବର, ପ୍ରଧାନଶିକ୍ଷକ ସୁବାସ ଚନ୍ଦ୍ର ଖୁରା, ଶିକ୍ଷୟିତ୍ରୀ ଓ ଗ୍ରାମବାସୀଙ୍କ ଉପସ୍ଥିତିରେ ଉତ୍ସବଟି ଆନନ୍ଦମୟ ପରିବେଶରେ ସମ୍ପନ୍ନ ହୋଇଥିଲା। ଶେଷରେ ଗ୍ରାମର ଭାଗବତ ଟୁଙ୍ଗୀ ପାଇଁ ସରପଞ୍ଚଙ୍କୁ ଏକ ରାମଚରିତମାନସ ପୁସ୍ତକ ପ୍ରଦାନ କରାଯାଇଥିଲା।